180 Joor Ranzeschnitte
(Feschtschrift zur gaischtige Landesvertaidigung fir alliSiibedupf-Romantiker)
Basel-Stadt und Basel-Land
wänn’s probiere – miitenand!
Me het e Hoffnigsschimmer gseh,
e partnerschaftlig „Gää“ und Gee“.
Me baschtlet an der Vision:
„Statt zwai mool Halb- ai Vollkanton!“
Die erschte fieberen in Trance
statt vo „Schanze“ jetz vo „Chance“.
Me sott, statt wyter tiefi Grääbe
graaben äntlig zämmelääbe.
S wär an der Zyt, me wurd probiere,
was zämmegheert au zämme z’fiehre.
Die Botschaft aber passt nid alle.
Bruefs-Rampasse will das nid gfalle.
Was dääne z vyyl isch, das isch z vyyl.
Si mache z Fränggedorf mobil.
Denn statt Basel an mim Rhy
zellt fir die nur d Nostalgie...
Doozmool, bi dr Hülfteschanze,
griege d Stedter uff dr Ranze.
Baselbieter Buure-Rammel
vo Sissech, Lieschtel, au vo Ammel
ziehn in d Schlacht – und schleen denn zue
(„Hooligans“ säisch hütt drzue).
Ohni Rücksicht und Erbarme
jaage si die letschten arme
Stadt-Armischte in Hardwald,
machen alli kalt – und bald
scho ziehn si im Triumphzug zrugg
uff Sissech, Lieschtel, Langebrugg.
Wo si denn voll Stolz verkinde,
wie si deert die Stänzler-Grinde
zem Buure-Boccia-Spiile bruuche.
Jä, doozmool droot so grobe, ruuche
Schlächter no kai Konsequänz:
„Den Haag“ und „Fremdi-Richter“ Pflänz
sinn unbekannt – und drum per se
no hütt e Gspängscht fir d SVP.
Die SVP het, comme il faut,
d Fääderfiehrig iibernoo
und macht das Schnapszahl-Jubileum
zum Anti-Fusions Te Deum.
Dr Oski Kämpfer (däm si nomen
isch in däm Fall s passend omen)
zieht in sim „Schüblig-Dialekt“,
wo d Hörerschaft e bitz verschreckt,
zerscht vom Läder – denn in d Schlacht,
ass es rhetorisch nur so kracht.
Sekundiert vom Chaschper Baader,
Ex-Chef vom Nationalrootskader,
Ex-Kandidat in Ständeroot,
(was glorios in d Hoose goot)
wo aifach fascht nid kha verwinde,
ass uss sim liebe Gälterkinde
d Rahmdääfeli in d Stadt verschwinde...
D Schneebärger losst sich in däm Sau-
Bannerzug als Quotefrau
Yyspanne – woorschyyns primär drum,
will si in däm Gremium
garantiert nid wiider brav
muess zruggstoo – hinter d Maja Graf...
E paar Daag speeter, z Lieschtel oobe,
het e Phantom si Stimm erhoobe.
Dr Muuser Schang dräit vor em Tor
e Bluet-und-Boode-Hymne vor,
beschwört bi dääre Gläägehäit
simpli Rotstab-Säligkeit.
Beesi Zunge bhaupte glyy,
si häige doch die Melodie
irgend näimen au scho gheert.
Und dank YouTube hämmer glehrt:
„Es wird schon gleich dunkel“, häisst s Original.
Das passt au zum Sujet ganz phänomenal!
S Requisit (verstaubt) und die zindendi Lampe derzue (abglöscht) sin
noo der Fasnacht z gsee uff em Container-Terminal z Fränggedorf –
grad nääben Trennigsdänggmool.
Gratis Ydritt mit Landschäftler Blaggedde!