Fasnacht light
E aasteggende Virus grasiert uff däre Wält
Alles draait sich nur ums Gäld
Me spaart und spaart wo’s numme goot
Das understützt au unsere Bundesroot
D Unternähmenstyyr isch zwar bachab
Em Ueli stinggts, är macht fascht schlapp
Dr Berset erhöht d’Prämie vo de Granggekasse
D’Somaruga verminderet d’Yywanderigsmasse
Drfür bruuchts gniegend Armee, maint dr Guy
Är will nüd spaare, au nid bim Wyy
Dr Trump stoppt sofort Obamacare
Au syyni Frisur spaart an ere Schäär
Z’Basel spaart d’Regierig dr Morain y
Si kenne schyns guet au ohni ihn sy
Mir finde me kennt z’Basel no mee spaare
Wenn dr Blocher mit Tochter wurdi abfaare
Au uns hett dr Virus befalle
Mr spaare y an Gwicht, das duet uns gfalle
Dr Vortrab isch glainer, s‘Costume isch alt
Mr hän kai Ladäärne und mache viel Halt
D Pfyffer sin’s wenig, d Tambure fääle – so stöhn mr y
Aber mit Tön spaare mr nid au nid mit em Wyy
Denn mr hänn z’Jubiliere, kuum zum glaube, aber es isch woor
Zäh Joor Pfyffebutzer – und dr Janser kunnt nümm vor
Dä Drau-Ma hänn mr scho lang y gspart
Aber d‘Draummänner bringe uns immer no in faart
Drum isch uns doch die Spaarwuet do so lang wie breit
Mr mache aifach daas Joor druss e Fasnacht light!