Dur die rooserooti Brille
Uf däre Wält hets so viel schlächts
politisiert wird als wie mee rächts.
E Muure sig e Schutz vor em Böse
drbi will dr Trump nur si Wahlverspräche yylöse
aber s’Böse isch im Ami-Land scho drin
und zwar in däm blondierte Kopf mit gar nyt Gscheitem drin.
Au Europa gwagglet und isch bald nimme komplett,
wenn s klappt was Theresa mit em Brexit wett.
Und d’Angela isch stiller worde
Drfir isch Franggryych am überborde
Die gääle Schyylee sin fescht am kämpfe
Und die gääle Lyybli dien d FCB-Stimmig dämpfe
Do het doch YB uf em Platz fir aimool Pfuus
und d Meischterfyr isch, statt am Barfi, vor em Bundeshuus
No hundertdrei Mool isch das Johr s letscht mool Muba
Bald findsch au d Swatch - statt am Basler World - in Kuba
Und die katholisch Kirche het vyyli Sinder
die Brieder byychte aber misshandle sogar Nunne und Kinder!
Alles wirkt dunggelschwaarz bi so viel Eländ und Noot
Dangg unsere Brille gsehn mir s zem Gligg no rooseroot:
Dr Blick am Oobe das Kääsblatt sin mr loos
numme lääri roosa Boxe glänze no famos
D Barbie bekunnt e neie Look denn si fyrt sächzig Joor
mir gseen das Bäbi jetzt scho mit rooseroote Hoor
D Basler Schugger hän illegal e Tesla kauft
sie kenne aber nit teschte eb er lauft
denn s FBI loost bi jedere Fahrt mit
das alles wil si en blau gno hän, drotzdäm s en rosa git!
Au Bärn regiert nei rooseroot
nimm am Härd und nimm im Käller stoot
die Frauepower jetzt im Bundesroot!
Hett dr FCB s Gäld fir ir Jubiläum graue,
denn si hän in Gala dinniert ooni iri Fraue?
Die Wieber hän miesse - me ka s nit fasse -
rooserooti Leesli verkaufe – nur fir in weeli Kasse?
S Basler Spittel will mit em Landschaftspittel fusioniere
Und d’Dossier vo de Patiänte elektronisiere
Aber s‘ Rotliechtmillieu sait, dass das nit goot
Sin ächt iri Akte rot und nit rooseroot?
D Joggelihalle isch jetz modärn
dr Roger spielt au in dr neie Halle gäärn
S Turnier hett är wieder gwunne – das das in sym Alter no goot?
Do gits kai Zwiefel – das isch klar- denn syni Japaner-Lybli sin rooseroot.
Die schwarze Guggemusikkepf mien e neie Name haa
Zem Byspiil graui Rhygass oder Brunkopf – aber jo nit Schwarzafrika
Zem Gligg dien mir uf unsere Kepf rosa draage
So ka uns s Rassismusgsetz sicher nit verklage.
Iberhaupt mit däre rooseroote Brille – die isch aifach e Hitt
Ka me gar nit glaube, dass es so viel Schlächts uff däre Wält git
S Glas isch nimm halb läär sodern halb voll
D Basler Regieririg findet me uffsmool toll
Me het kai Angscht me dr Bahnhofsplatz z iberquere
Au gege YB muess sich dr FCB nimme weere
D Baselbieter sage nimme mir wei luege
Si hälfe uffsmool mit die Kanteen zämme z fuege
Und alli wäre nit truurig sondern wurde sich freie do hälfe mr wette
Wenn dr Äschbi rooserooti Rose bikämt vo dr Basler Bachelorette.