Basel isch gaischtryych
Sit iber hundertnyynzig Johr spuugg ich scho umenand,
männgmool z Ziiri, männgmool z Bärn, aigentlig im ganze Land.
Als ä modärne Gaischt vo hit, find ich im Internet,
as es schyynts in Basel e huffe Gaischter het.
Die Stadt syyg gaischtryych, kame lääse, daasch doch der Hit,
Deert muess y schnällschtens au mool aane, wenn s deert viel Gaischter git.
immer ainsam umme z spuugge, find y nimmi luschtig
Mit Frinde zämme Lyt verschregge, doo druff wär y gluschtig.
Kette, Bettduech, - nid nur ains - pagg y in mi Däsche,
Saiffi, Shamppo bruch y nid, as Gaischt muesch di nid wäsche.
Won ich denn in Basel bi, iberfaart mi fascht ä Drämmli,
Mir goots grad wie em Gröhnemeyer, dä Schwoob, dä said das nämmli.
Denn kunnt scho grad dr nägschti Schogg: «Wo sinn jetzt die Kollege?»,
han ich do eppis faslch verstande – y mues mol iberleege.
Laider hann y miese mergge, as z Basel deert die Gleen,
unter gaischtryych allem aa eppis Anders versteen.
E Stadt vo Dängger, grosse Gaisschter soll das schyynbar si,
denn frog y mi ganz haimligg: «Isch dr Shakiri do au derbi?»
Dä isch jetzt schyynbar wieder do, um der FCB z understitze
Hoffe mer dä wird in Basel meer as z Bayern nitze.
Wo mir grad bi Dängger sinn, do gits eson e FH,
wo me Pädagogik leert, do dra hätt ich au Spass gha.
Sottisch deerte Leerer wärde, gits ai Problem per se,
wenn de s erscht mol unterrichtisch hesch no nie e Schieler gse.
So, jetzt lueg y erscht mol, won ich ka go pfuuse,
In Bettige gäbs schyynts ä Hoof - denn gang i halt deert uuse.
E son e alte Buurehoof, kennt y jo probiere,
schyynts wurd sich usser mir, jo kaine intressiere.
Mensche hetts do laider nid, wo ich kennt verschregge,
Derfir sinn sich do dausigi Kääfer am verstegge.
Au die sinn als Tourischte ko, um Basel kenne z bsueche
Doch doo wills si dängg kaine ha – d Basler sinn halt Rueche.
EILMELDUNG: «Tausende von japanischen Besuchern von Basel nach Zürich umgesiedelt….» (jo, y waiss, dasch nid woor – stell ich mir halt luschtig vor…)
Nääbä däre falsche Mäldig, hett me aber ghert,
As dr ESC uff Basel kunnt – au das hett Männge gsteert.
Schyynts wurde do nur schreegi Type uf dr Biini singe,
und das wurd unsri Jugend vom rächte Wääg abbringe.
Y muess mi dängg entscheide, was ich jetzt wott mache.
As Gaischt hesch do in Basel wiirgglig garnyt z Lache.
Suech ich mir en andere Blatz, und gang wägg vom Rhy,
oder hilf ich dääre Stadt und setz mi richtig y.
Ains hann i gleert, dää scheeni Ort, brucht ä gueti Fierig,
denn gang y drum in d Politigg und nimm yfluss uff d Regierig.
Doodermit wär sicher gstellt, as jede au verstoot.
Gaischtryych isch in Basel zmindescht dr Regierigsroot.