äpp änd daun
Sibe Ängeli, klai und fyn,
mit eme goldige Haailigeschyyn,
hänn vo Grund uff welle leere pfyffe,
und bi de Deen nit dernääbe gryffe.
Dr Deifel aber het iine d Fliigel gstutzt,
zem Fliege hänn die dernoo nyt mee gnutzt.
Diä gfallene Ängel hän sich trotzdäm erhobe,
und sin uff em Bäse in d'Nacht use gflooge.
So gange isch's ainige Prominänzler au
gheersches im Radio oder im TVau.
Mool oobe, mool unde - mool unde, mool oobe
das gseesch bsunders guet bi de Nochbere,
de Schwobe.
Dr Gutenberg, voller Eergyz, brobiert dr Spagaat,
und fliegt denn uff e Ranze mit syym Plagiaat.
Au d Calmy Rey, jo s muess fascht so syy,
das Braitmuulfröschli isch ai nimm derbyy.
Verwitscht het's au ain wie dr Kachelmaa,
dä het halt zvyyl Drugg im Hoodesäggli kaa.
Noch eme Kokainstössli, jetzt muesch loose,
het s denn äntlig au dr Hirschmann verbloose.
Esoon e Sexbessässene hänn au d Franzose,
nämli dr Kahn mit allzyt offener Hoose.
Hildebrand sotsch hüt au nid heisse,
sunscht würd dr Blocher no uf's Konto gneise.
äpp and daun gohts iberall
mir hoffe s'viert Comitée wird nid zum FALL...