„Mir tigge wyter“
Kai Fasnacht meh und nyd zem Lache
nur Führhöll, Explosione und so Sache.
Mir hän scho dänkt o jemineh
d‘ Maya hän unser Ändi vorusgseh.
Denn isch är ko dä ominösi Daag
und d‘Zyt isch gloffe Schlag uff Schlag.
Mir zelle zrugg Stund um Stund
doch d‘Ärde isch blyybe kugelerund.
Dr Untergang hän doch e paar wörtlig gnoh
dä italienisch Kapitän kurz vor Cilio.
Är het vor luter Decoltée
dä Fels im Meer duss nümme gseh.
Au d‘BAZ duet d’Sunntigussgoob ystelle
numme, die het sowieso niemerts welle.
Me hät statt Druggerey gschlosse
lieber dr Markus Somm abgschosse.
S‘ Banggeghaimniss do weisch nid Gnaus
isch das wirgligg eppis Schlaus?
Oder sött me das nid lieber au begraabe
mit em Stadttheater sine letschte Schaabe.
Do rieft no aine Hello Hello
Derno hän sie im Moritz s’letschte Flugi gnoh.
Dä Kalender vo de Maya muess me korrigiere
oder aifach fyr morn neu interpretiere.
Und ains bliibt klar und isch nid schyter
mir Basler tigge anderscht wyter