Sit Joore stolpere mir durch d Gässli,
mache do und deert e Gspässli.
D Frau Fasnacht duet uns inspiriere
und allewyyl vo neiem motiviere.
Statt uff dr Biini z hyperventiliere
dien mir am Rhyboord bromeniere.
Isch s duss emool e bizli z kalt
denn mache mir e glaine Zwischehalt.
Kaine dänggt an die vergangene Zyte
s wott jeede uff dr neie Wälle rytte.
D Fasnacht isch halt aifach scheen
au ooni Charly und andere Gleen.
Dr Voordraab und e Hampfle Pfyffer
mir alli sinn e Jöörli ryffer.
Das gheersch an däne scheene Deenli
und drzue es Reggwisyt als Kreenli.
Als Pfyffebutzer geen mir ab uff d Pischte,
au wenn bim Komytee nit uff dr Lischte.
S isch alles nei, kaim het s bresiert
und scho isch d Aamäldig z spoot basiert.
Doch mit oder ooni Subventioone,
duet sich d Fasnacht fir uns loone.
Eich vom Komytee wänn mir griesse
und die drei scheenschte Dääg au gniesse.
S Fasnachtsfyyr isch nei entfacht,
s wird drummled, pfyffe und vyyl glacht.
Dr Obmaa waiss wo s duure goot,
Bis es am Donnschtig wiider Vieri schloot.
Yystoo Pfyffebutzer … voorwärts marsch!